Արցախը տան կրտսեր զավակն էր
Սեպտեմբերի 22-ին հակառակորդի կողմից կրակոցից մահացած 20–ամյա Արցախ Հովսեփյանը Արցախի Քաշաթաղի շրջանի Տիգրանավան գյուղի բնակիչ էր, տան կրտսեր զավակն էր։ Այս մասին NEWS.am-ի հետ զրույցում ասաց Արցախի Քաշաթաղի վարչական շրջանի ղեկավար Արտյուշա Մխիթարյանը՝ նշելով, որ Արցախն ունի իրենից մեծ 4 եղբայր ։
«Արցախը տան կրտսեր զավակն էր, իրենից մեծ 4 եղբայր ունի, ովքեր բոլորն էլ արդեն ծառայել են բանակում։ Ծնողներն էլ ոչ մի տեղ չեն աշխատում, գյուղատնտեսական աշխատանքներով են զբաղվում, եղբայրներից մեկը պայմանագրային զինծառայող է, մնացածը զբաղվում են գյուղատնտեսական աշխատանքներով»,–ասաց Արտյուշա Մխիթարյան։
Քաշաթաղի վարչական շրջանի ղեկավարը հայտնեց, որ Արցախ Հովսեփյանի հուղարկավորությունը այսօր է եղել՝ զինվորական կարգով։
«Արցախը շատ խելոք երեխա էր, միշտ պատրաստակամ, բարի։ Ավարտել է գյուղի միջնակարգ դպրոցը եւ մեկնել ծառայության»,–ասաց Արտյուշա Մխիթարյանը։
Ավելի վաղ NEWS.am-ը հայտնել էր, որ սեպտեմբերի 22-ին ժամը 16:00-ի սահմաններում ՊԲ արեւելյան ուղղությամբ տեղակայված զորամասերից մեկի պահպանության տեղամասում, հակառակորդի կողմից արձակված կրակոցից մահացու հրազենային վիրավորում է ստացել ՊԲ զինծառայող, 1998թ. ծնված Արցախ Մհերի Հովսեփյանը:
Արցախ Հովսեփյանը հետմահու ԱՀ նախագահ Բակո Սահակյանի կողմից պարգեւատրվել է «Մարտական ծառայություն» մեդալով։
Առաջին կայազորային քննչական բաժնում ազգային, ռասայական կամ կրոնական ատելության կամ կրոնական մոլեռանդության շարժառիթով սպանություն կատարելու դեպքի առթիվ հարուցվել է քրեական գործ: Կատարվում է նախաքննություն: