Ասաց ու գնաց
Լեռնային Ղարաբաղի Հանրապետության Մարտակերտի շրջանում ապրիլի 4-ին հակառակորդն անօդաչու սարքով ռմբակոծել էր Սիսիանի ջոկատի ավտոբուսը, զոհվել էր սյունեցի ութ կամավորական, այդ թվում նաև 56-ամյա Գագիկ Փարսադանյան (Կապան): Նա արցախյան պատերազմի մասնակից է, երկու անգամ վիրավորվել էր:
«Երբ ասաց, որ գնալու է Ղարաբաղ, չհավատացի, առողջականը լավ չէր: Բայց տեսա, որ իրոք պատրաստվում է գնալ: Ու՝ գնաց: Շատ էր սիրում իր հայրենիքը»,- Panorama.am-ի հետ զրույցում ասաց Գ.Փարսադանյանի կինը՝ Անահիտ Փարսադանյանը:
Նա իր 12-ամյա դստեր հետ եկել էր Երևան. «Երազ» պուրակում զոհված զինծառայողների երեխաների համար Երեխաների պաշտպանության օրվան նվիրված միջոցառում էր կազմակերպվել:
Տիկին Անահիտը պատմեց, որ Արցախյան պատերազմի ժամանակ թուրքերը շրջապատել էին ամուսնուն, իսկ նա սկսել էր խոսել թուրքերեն, ներկայացել է որպես Հասան. «Մինչև հիմա Հասան էին իրեն ասում»:
12-ամյա Գայանեն, Ա.Փարսադանյանի խոսքով, ոչ մի րոպե չի մոռանում հայրիկին. «Իր պապային է ուզում: Ասում եմ՝ լավ էլի, Գայանե ջան, ասում է՝ պապայիս եմ ուզում: Ով դուռը թակում է, վազում է ու բացում, մտածում է, թե հայրն է: Ասում է՝ գիտեմ, մի օր պապաս գալու է: Այդ հույսին է»:
Տիկին Անահիտն ունի ևս մեկ դուստր՝ 29 տարեկան, ամուսնացած է, և երկու որդի՝ 23 և 25 տարեկան: 23-ամյա որդին չի ծառայել, առողջական խնդիրներ ունի, իսկ 25-ամյա որդին ծառայել է, սակայն հիմա երիկամի հետ կապված խնդիրներ ունի: