Մխիթար Աղաբեկյան

Մխիթար Ավետիքի Աղաբեկյանը ծնվել է 2002թ. հունիսի 7-ին Մարտակերտի շրջանի Վաղուհաս գյուղում, բայց ապրել է Մարտակերտ քաղաքում: 2008-2020թթ. սովորել է Մարտակերտի Վ. Բալայանի անվան թիվ 1 միջնակարգ դպրոցում: Դպրոցն ավարտելուց հետո ընդունվել է ԵՊՀ տեղեկատվական տեխնոլոգիա բաժինը: Նույն թվականի հուլիսին զորակոչվել է պարտադիր զինվորական ծառայության:

«Միայն լավ խոսքերով կարող եմ բնութագրել Մխիթարին: Նա պարտաճանաչ,պատասխանատու և մի քիչ էլ ամաչկոտ էր: Պարզ հոգի ուներ, երբեք անպատրաստ չէր ներկայանում դպրոց, նա գերազանց էր: Վստահ եմ, որ ծառայության ընթացքում նույնպես եղել է գերազանց: Մեր հիշողության մեջ նա մի քաղցր հուշ է: Հայրենիքին անմնացորդ նվիրվեց, մեծ ցավ էր նրա զոհվելը, բայց այդքանով մեկտեղ ես հպարտանում եմ, որ ունենք նրա նման սան»,-ասում է դպրոցի տնօրեն Ռուզաննա Հարությունյանը:

«Բառ չեմ կարողանում գտնել նրան մեծարելու համար, չեմ կարող ասել այնպիսի խոսք, որ սիրտս հանգստանա: Ամեն առարկա ուրիշ ձև էր սիրում, ուրիշ ձև պատրաստվում: Իմ առարկայից (հայոց պատմությունից) Ստեփանակերտում մասնակցել է օլիմպիադաների, հասել հաջողության և խրախուսվել պատվոգրերով»,-հավելում է պատմության ուսուցիչ Արսեն Գասպարյանը, ով նաև եղել է Մխիթարի դասղեկը:

Մխիթարին բոլորն էին սիրում իր համեստության, նվիրվածության, պատրաստակամության համար, թե դպրոցում, թե դպրոցից դուրս բոլորն էլ նրա մասին խոսելիս ասում են՝ «Նրա նման երեխա չկա»:

Պատերազմի ընթացքում Մխիթարին Ջաբրայիլից տեղափոխեցին Մարտունու շրջանի Քերթ գյուղի տարածք, որտեղ հոկտեմբերի 29-ին «Բայրաքթար» անօդաչուի հարվածից Մխիթարն անմահացավ՝ դասվելով նորօրյա հերոսների շարքին: 

 

Նյութը՝ «Ջրաբերդ պաշտոնաթերթ» ֆեյսբուքյան էջից