Հայրենիքի պաշտպանության ժամանակ արիաբար զոհված Վարդանն այսօր՝ հունիսի 12-ին, կդառնար 23 տարեկան։
Վարդանը ծնվել է 1995թվ. Արարատի մարզի՝ Հովտաշեն գյուղում: Տեղի դպրոցն ավարտելուց հետո ընդունվել է Երևանի Ճգնաժամային կառավարման պետական ակադեմիան:
Վարդանը հավասարակշռված ու բարի մարդ էր, սիրում էր մշտապես սովորել ու ավելացնել իր գիտելիքների պաշարը։
Վարդանը պարտադիր զինվորական ծառայության է անցել ԱՀ՝ Ասկերանի շրջանի N զորամասերից մեկում: Ծառայությանը Վարդանը միշտ մեծ պատասխանատվությամբ է վերաբերվել, բարեխղճորեն իրականացրել իրեն տրված հրամանները։
2015թվ. հունվարի 2-ի՝ լույս 3-ի գիշերը ժամը 03:15-ի սահմաններում, ՊԲ սահմանային դիրքերի հարավային և արևելյան ուղղություններով ադրբեջանական զինուժը ձեռնարկել է դիվերսիոն հետախուզական երկու գործողություն: Հակառակորդին դիմակայելու ընթացքում զոհվել են զինծառայողներ՝ Կարեն Սամվելի Գրիգորյանը և Վարդան Մարտիկի Մկրտչյանը։
Վարդանն ու Կարենը անձնվիրաբար կռվել են թշնամու դեմ թույլ չտալով նրան իրականացնել մարտական խնդիրը։ Վարդան Մկրտչյանը հետմահու պարգևատրվել է ՀՀ և ԱՀ Նախագահների կողմից՝ «Արիության համար » մեդալներով։
«Հանուն հայ զինվորի» ՀԿ-ն և Banak.info-ի խմբագրությունը ցավակցում են ընտանիքի անդամներին և կիսում կորստյան ծանր վիշտը: