Նարեկ Հարությունյան

Նարեկ Վոլոդյայի Հարությունյանը ծնվել է 2001 թվականի ապրիլի 10-ին Արմավիրի մարզի գյուղ Փարաքարում։ 

Նարեկը   շատ խոշոր է ծնվել, բժշկուհին նրան նմանեցրել էր  առնական ու դյուցազն Սասունցի Դավթին և ասել՝ ծնվեց Հայոց Սասունցի Դավիթը։ Այդպես էլ կանվանակոչեին նորածնին եթե չլիներ մեծ եղբոր որոշումն, որ եղբորն պետք է Նարեկ անվանեն։ 

Մանկուց Նարեկը շատ համեստ, բարի, խելացի, պարտաճանաչ էր, բայց միևնույն ժամանակ շատ աշխույժ երեխա։ 

2007 թվականին հաճախել է Արմավիր մարզի Թաիրովի միջնակարգ դպրոցը։ Սովորել է մինչև երրորդ դասարան՝ ունենալով գերազանց հաջողություններ։

2010 թվականին Նարեկն ընտանիքով մեկնում է Մոսկվա՝ բնակության և ուսումն արդեն շարունակում այնտեղ։ 

 Նարեկն ինչպես Հայաստանում, այնպես էլ ՌԴ-ում զբաղվում էր սպորտով՝ դյուդո, սամբո, ազատ ըմբշամարտ՝ գրանցելով բազմաթիվ հաջողություններ ի վերջո դառնալով Մոսկվայի Միտիշիի բազմակի չեմպիոն, կենտրոնական դաշնային շրջանի եռակի չեմպիոն և  Աշխարհի չեմպիոն՝  բազմակի անգամ  ծածանելով  Հայոց Եռագույնը։  

2016 թվականին ավարտելով դպրոցը՝ ընդունվում է Մոսկվայի Կոմերցիոն համալսարանին կից քոլեջ՝ ընտրելով Կոմերցիոն մենեջերի մասնագիտությունը, սակայն որոշում է ուսումը շարունակել Հայրենիքին պարտքը տալուց հետո։ 

Հայաստան վերադառնալուց հետո նա իր իսթագրամյան էջում գրառում էր արել՝  «Հիշեք անունս, որ գրեք մեծատառերով»: Իսկ զորակոչվելուց առաջ՝ «Այսուհետ նկարից մոտիկ ես չեմ լինի ձեզ» խոսքերն։ Ուղղակի զուգադիպություն, թե... 

Նարեկն զորակոչվել է Հայոց Բանակ 2020 թվականի օգոստոսի 7-ին, անցնելով ծառայության Արցախի Մարտակերտ 49971 զորամասում, 5-րդ գումարտակում։ Հրամանատարը շատ էր սիրում Նարեկին, 1 ամսվա ընթացքում, գնահատելով նրա բոլոր դրական հատկանիշները, նշանակում է վաշտի ավագ ցանկանալով իր մոտ պահել որպես հետախույզ, սակայն Նարեկն իր ցանկությամբ ծառայությունը շարունակում է որպես հրետանավոր։

Նարեկն իր էությամբ շատ ռոմանտիկ Էր, սիրում էր բոլորին արժանացնել ուշադրության, ամենքին տալով իր սերն ու բարությունը։ Նարեկը միշտ էլ կմնա սիրված եղբայր և սիրելի զարմիկ։ 

Ուներ բազում երազանքներ` ծառայությունից հետո պետք է բնակություն հաստատեր Հայաստանում, գծել էր նույնիսկ իր տան հատակագիծը։ Ցանկանում էր, որ տունը լիներ սարի վրա՝  շրջապատված եղևնիներով, որ նոր տարվա եղևնին զարդարվեր բակում: Սակայն ի ցավ բոլորիս հերոսն ընտրեց Եռաբլուրը։ 

Արցախի նախագահի կողմից Նարեկը պարգևվատրվել է «Մարտական ծառայության» մեդալով:

Նարեկ Հարությունյանը հուղարկավորված է Եռաբլուրում։