Ազիզ Աղաջանյան

«Մամ ջան, ամեն ինչ նորմալ է…բարի գիշեր քաղցրս…»,-արցախյան պատերազմում  զոհված Ազիզ Աղաջանյանի նամակն է՝ մորը:

«Ազիզը իմ մինուճար որդին էր, երկու աղջիկ ունեմ… նա տան փոքրն էր: Շատ նրբանկատ էր, զգայուն. մեծի հետ՝մեծ, փոքրի հետ՝ փոքր, կյանքով լի ու խելացի: Ազիզին շատ դժվար էր հասկանալ, շատ խորը մտածելակերպ ուներ:

Ծառայության վեց ամիսը Լուսակերտում է անցել, հետո  ծառայությունը շարունակել Մեղրիի  զորամասում, որպես հաշվարկի հրամանատար։

Ազիզը երբեք ծառայությունից չի դժգոհել. այնպես  էր ներկայացնում, որ  մեկ-մեկ ասում էի՝տղա ջան կարողա՞ մենք քեզ հանգստյան տուն ենք ուղարկել, որովհետև Լուսակերտում երևի զինվոր  չլիներ, որ չբողոքեր»,- ԳԱԼԱ-ի հետ զրույցում պատմում է արցախյան պատերազմում զոհված ժամկետային զինծառայող Ազիզ Աղաջանյանի մայրը՝ Մելանյա Հարոյանը:

«Ես  չեմ կարողանում ինձ ներել, որ մենք  հնարավորություն ունեինք  նրան բանակից ազատել, բայց ես էլ, հայրն էլ նման միտք չենք ունեցել. ասել ենք՝ մեր տղան պիտի ծառայի:

Ազիզը հայրենասեր է մեծացել, երբ  զորամասից զանգում էր՝ հայրենասիրական երգեր էր երգում: Շատ էր սիրում հայրենիքը…»,- ասում է Մելանյա  Հարոյանը:

Վերջին  անգամ տիկին Մելանյան որդու հետ խոսել է հոկտեմբերի 18-ին:

«Ամբողջ պատերազմի ընթացքում  մեզ հետ խոսելիս ասում  էր՝ ոչ մի բան էլ չկա, սաղ նորմալ է, անհանգստանալու բան չկա, իրենք հանգիստ տեղ են, թաքստոցում են: Այնինչ ընկերները պատմում են, թե ինչերի միջով է անցել, ընկերներին մինչև անգամ  զարմացրել է Ազիզի կամքի ուժը. թե ոնց է կարողացել նման թեժ կռվից հետո մեզ հետ հանգիստ խոսել: Էնքան խաղաղություն էր իմ մեջ մտցրել, որ ես գիտեի, որ  իմ տղային  Աստված է տվել եւ չի կարող խլել:

Ամսի 18-ի գիշերը ինձ նամակ գրեց. մամ ջան ամեն ինչ  լավ է, ուղղակի կապ չկա՝ դրա համար չեմ կարող  զանգել. բարի  գիշեր քաղցրս»,-պատմում է հերոսի մայրը:

Կրտսեր սերժանտ Ազիզ Սամվելի Աղաջանյանը 1 տարի 3 ամսվա ծառայող  էր, երբ սկսվեց Ադրբեջանի կողմից Արցախի դեմ սանձազերծված պատերազմը:

Ազիզը ծնվել է 2001թ.-ի մայիսի 20-ին Արմավիրի մարզի Արմավիր քաղաքում: Դպրոցն ավարտելուց հետո ընդունվել է Հայ-ամերիկյան համալսարան: Մայրն ասում է, որ որդին իր բացառիկ կարողությունների շնորհիվ առանց հարցազրույցի ընդունվել էր ծրագրավորման բաժին:

Հոկտեմբերի 3-ին Ազիզ Աղաջանյանին տեղափոխել են Ջաբրայիլ՝ Ջրական, մասնակցել  է թեժ մարտերին, իր  հաշվարկների շնորհիվ  ոչնչացրել է թշնամու մարդուժը, փրկել ծառայակից ընկերների կյանքը:

19-ամյա կրտսեր սերժանտը զոհվել է հոկտեմբերի 19-ին, Ջաբրայիլից  հետ գալու ճանապարհին:

Տիկին Մելանյան ասում է՝ ինչքան էլ  ասեն, որ հերոսի մայր է, միևնույնն է ոչ մի  մայր չի  ուզում հերոս ունենալ:

«Դրանից դաժան բան չկա. քո  երեխայի  կյանքը, չապրած տարիները… ինչի՞  համար  հպարտանաս, որ ծնողը  չի  չարանա, երբ իր  կյանքով լի երեխուն զոհաբերել են:

Ասում էր՝ ինչքան ձերն եմ, այնքան էլ հայրենիքինն եմ: Իմ տղան իր կյանքը վտանգելով՝ տասնյակ կյանքեր է փրկել, շիրիմի  մոտ  կանգնած տղերքից ասում էին, որ  իրենց  կյանքը Ազիզն է փրկել և մենք  հիմա էստեղ կանգնած ենք նրա շնորհիվ»:

 

Նյութը՝ galatv.am-ից
19.04.2021