Բախտը մեկն է զինվորի՝ կա՛մ մահ կա՛մ ազատություն
Կիմ Սիմոնի Խաչատրյանը ծնվել է 1995 թ. մարտի 17-ին Վայոց ձորի մարզի Արենի գյուղում։ 2014-2016 թվականներին ժամկետային զինվորական ծառայության ավարտից հետո սովորում էր ԵՊԲՀ-ում։
Աժպագա ատամնաբույժն աչքի էր ընկնում բացառիկ հայրենասիրությամբ։ ՀՅԴ անդամ էր, ազգայնական գաղաափարախոսության ջատագով ու առաջամարտիկ։ Ազգային, ռազմահայրենասիրական երգը երիտասարդ հայորդու տարերքն էր դեռ մանուկ հասակից։
Արցախյան երրորդ պատերազմին Կիմը մասնակցել էր կամավոր՝ Դաշնակցության կամավորական ջոկատի կազմում։
Մատաղիս մեկնելուց առաջ գրել էր. «Բախտը մեկն է զինվորի՝ կա՛մ մահ կա՛մ ազատություն»։ Մարտական ընկերները պատմում են, որ անգամ մարտի դաշտում Կիմը կռվում էր ռազմերգը շուրթերին, իր խրոխտ երգով ոգևորելով և պայքարի կոչելով զինակից եղբայրներին։
Հոկտեմբերի 31-ին Եղնիկների թեժ մարտերում ընկավ հայորդին։ Ընկավ հանուն հայրենիքի, հանուն ազատության այն վեհ գաղափարի, որով ապրել էր իր երիտասարդ ու իմաստալից կյանքը։
Անմահացավ Կիմը՝ կերտելով գաղափարին նվիրյալ մարտիկի այն կերպարը, որի շնորհիվ կանգուն մնաց հերոսի պաշտելի հայրենիքը։