Հաղթանակն է, որ դարձնում է ուժեղ և ինքնավստահ
Վահե Արմենի Կարապետյանը ծնվել է 2001 թվականի հոկտեմբերի 6-ին ՝ Երևանում։ Վահեն դեռ մանկուց աչքի է ընկել հատուկ ընդունակություններով ՝ հիացնելով և զարմացնելով շրջապատի մարդկանց։
2006-2007թթ. հաճախել է Աջափնյակ համայնքի թիվ 166 մանկապարտեզ։ 2007թ.-ին ընդունվել է Երևանի Լևոն Միրիջանյանի անվան թիվ 155 միջնակարգ դպրոց։
Ցուցաբերելով բարձր առաջադիմություն՝ Վահեն մասնակցել է բազում օլիմպիադաների և գրանցել մեծ հաջողություններ։ Վահեն միշտ աչքի է ընկել իր սուր ինտելեկտով ինչի ապացույցն իր՝ շախմատում ունեցած հաջողություններն էին։
Շատ էր սիրում նկարչությունն ու երաժշտությունը։ Նկարել սովորել էր ինքնուրույն և օրեցօր ավելի էր կատարելագործել իր նկարչական հմտությունները (սկսել էր նկարել տարբեր ոճերում)։ 14 տարեկանում սկսեց ինքնուրույն կիթառ նվագել՝ օգտվելով համացանցից։ Կիթառով նվագում էր ոչ միայն հանրահայտ կիթառահարների երգացանկից , այլև սկսել էր ստեղծագործել ու հիմնադրել էր իր երաժշտական խումբը և ելույթներով հանդես եկել բազմաթիվ միջոցառումների և համերգների ժամանակ։
2016 թվականին գերազանց ավարտելով դպրոցը՝ կրթությունը շարունակել է հայ-ֆրանսիական քոլեջում։ Այնուհետև 2019թ.ին բարձր առաջադիմությամբ ընդունվել է հայ-ֆրանսիական համալսարան։ Վահեն տիրապետում էր 5 լեզվի՝ հայերեն, անգլերեն, ռուսերեն, ֆրանսերեն և գերմաներեն։ Չնայած Վահեն համալսարանում սովորել է ընդամենը կես տարի, սակայն հասցրել էր ձեռք բերել բազմաթիվ ընկերներ։ Ուսումը կիսատ թողնելով ՝ Վահեն մեկնել է ծառայության։ Սերժանտական դասընթացները անցկացրել է Քանաքեռում, այնուհետև տեղափոխվել է Սիսիանի զորամաս։ Վահեն ծառայում էր հրաձգային գումարտակում որպես ռադիոջոկի հրամանատար, կապի դասակի հրամանատարի տեղակալ։ Վահեն զորամասում մշակութային աշխատանքներին և կուլտ մասայական միջոցառումներին ակտիվ մասնակցելու, բարեխիղճ ծառայության և օրինակելի կարգապահության համար ստացել էր պատվոգիր Հայաստանի պաշտպանության նախարարությունից:
Պատերազմը սկսվելուն պես տեղափոխվել է Հադրութ։ Վահեն և իր ջոկատը այստեղ 4 օր գտնվել են շրջափակման մեջ։
Ադրբեջանաթուրքական ագրեսիան հետ մղելիս ՝ կռվելով մինչև վերջին շունչը, մեր հերոսը անմահացել է 2020 թվականի հոկտեմբերի 15-ին։
Բաւյց Վահեի մարմինը գտել են հունվարի 24-ին։ Հայրենիքի սահմանները պաշտպանելիս ցուցաբերած խիզախության և անմնացորդ նվիրումի համար Վահե Կարապետյանը հետմահու պարգևատրվել է «Մարտական ծառայության» մեդալով։
Վահեի կյանքի կարգախոսն էր՝
«Միշտ գնալ առաջ, առանց վարանելու հասնել նպատակին, վստահել սեփական ուժերին, և հավատալ հաղթանակին. Հաղթանակն է, որ դարձնում է ավելի ուժեղ, կոփված, պատասխանատու և ինքնավստահ» ։
Այո՜, մեր հերոսը հաղթեց՝ նիրելով կյանքը հանուն հայրենիքի։