Համեստ ու ժպտադեմ Արշալույսը
Արշալույս Գագիկի Սարգսյանը ծնվել է 1996 թ. ապրիլի 27֊ին Արմավիրի մարզի Նալբանդյան գյուղում։ 2012 թ. ավարտել է տեղի միջնակարգ դպրոցի 9֊րդ դասարանը։
2014 թ. հունիսի 19֊ին զորակոչվել է հայոց բանակ և ծառայել Տավուշի մարզի Բերդ գյուղում։
Ծառայության ընթացքում Արշալույսը աչքի է ընկել զինվորական պարտաճանաչությամբ և 2016 թ. պարգևատրվել է ՀՀ ՊՆ֊ի պատվոգրերով՝ ծառայության ընթացքում ցուցաբերած մարտական պատրաստության բարձր ցուցանիշների, բարեխիղճ ծառայության, օրինակելի զինվորական կարգապահության և հակառակորդի հետ շփման գծում մարտական հերթապահություն իրականացնելու համար։
Ապրիլյան քառօրյա պատերազմի ծանր ու դաժան ապրումները ի վերջո ուղորդեցին հողագործությամբ զբաղվող երիտասարդին զենք վերցնել և դարձյալ զինվորագրվել։ 2020 թ. Արշալույսն աշխատանքի է անցնում Շամշադինի N զորամասում՝ որպես պայմանագրային շարքային զինծառայող։
Սեպտեմբերի 27֊ին սկսած պատերազմը հայ ժողովրդի ճակատագրի աննախադեպ բեկումը դարձավ՝ անմահության տանելով լուսավոր տղաների մի ամբողջ սերունդ, կործանելով վերջինիս նպատակներն ու բազմազան երազանքները։ Նրանցից էր նաև համեստ ու ժպտադեմ Արշալույսը, որը հերթափոխը հանձնելուց հետո նպատակադրվել էր դասավորել անձնականը և ընտանիք կազմել։ Ցավոք չհասցրեց։
Ընկավ թշնամու ԱԹՍ֊ի զարկից՝ 2020թ. հոկտեմբերի 14֊ին Քարվաճառում։
2020թ. դեկտեմբերի 17֊ին Արշալույս Գագիկի Սարգսյանը հետմահու պարգևատրվել է ՀՀ ՊՆ պատվոգրի՝ ցուցաբերած արիության, հայրենիքի պաշտպանության գործում անմնացորդ նվիրումի, ներդրած ավանդի և անձնուրաց ծառայության համար։