Հայկ Մկրտչի Մկրտչյան՝ խելացի, համեստ, բարի, ընկերասեր, պարտաճանաչ, անկոտրուն կամքով քաջարի հերոս:
Հայկ Մկրտչյանը ծնվել է 2001 թվականի փետրվարի 3-ին ՀՀ Գեղարքունիքի մարզի Մարտունի քաղաքում: 2007թ.-ին ընդունվել է Մարտունու Ս. Դարբինյանի անվան №2 հիմնական դպրոցը: Դպրոցը ավարտելուց հետո ընդունվել է ՀՀ Գեղարքունիքի տարածաշրջանային պետական քոլեջի «Գործավարություն օտար լեզվի խորացված իմացությամբ» բաժինը:
2019թ. Հուլիսի 17-ին զորակոչվել է ՀՀ ԶՈՒ ծառայության, ԼՂՀ Որոտան, Կուբաթլուի մոտոհրաձգային վաշտ, այնուհետև տեղափոխվել է դիպուկահարների դասակ:
2020թ. սեպտեմբերի 27-ից մասնակցել է Արցախյան երկրորդ պատերազմին:
Կատարել է հրամանատարության հատուկ նշանակության առաջադրանքները՝ Քուչակ, Մարջալու գյուղերի տարածքներում: Քաջի մահով ընկել է 2020թ. հոկտեմբերի 15-ին հակառակորդի ԱԹՍ-ի հարվածից:
Հայրենիքի պաշտպանության գործում ներդրած ավանդի, մարտական գործողությունների ընթացքում ցուցաբերած խիզախության և անմնացորդ նվիրումի համար Հայաստանի Հանրապետության պաշտպանության նախարարության կողմից հետմահու պարգևատրվել է «Մարտական խաչ» 1-ին աստիճանի շքանշանով:
Փա՛ռք ու պատի՛վ բոլոր քաջերին, և հավերժ հիշատակ հանուն Հայրենիքի ընկածներին: