Հայորդին հող-հայրենիի փրկության համար չխնայեց ամենաթանկը
Հայրենակիցներ
Արցախյան գոյապայքարի նվիրյալ Արմեն Ծատրյանն այսօր կդառնար 50 տարեկան: Բայց ճակատագրով նրան ընձեռված առաքելությունը Հայրենիքի փրկության համար անխոնջ ու անզիջում մաքառումն էր, պայքարի միջոցով հայ ոգու և ինքնության հաստատումը:
Արմեն Ծատրյանի և իր զինակից ընկերների անցած մարտական ճանապարհը արիության դաս է նոր սերնդի համար, ռազմահայրենասիրական դաստիարակության լավագույն միջոց: Ճշմարիտ է ասված. «Հերոսական են մարդկային այն գործերը միայն, որոնց վրա ժամանակն ու մահը իշխանություն չունին»:
Հայրենիքի հանդեպ նվիրյալ քաջորդու պատասխանատվությունը մեծ էր այնքան, որ հայորդին հող-հայրենիի փրկության համար չխնայեց ամենաթանկը՝ երիտասարդ կյանքը: Հիրավի՛, «Ճշմարիտ հերոսականը տեղի ունեցավ այն օրը, երբ մարդը սովորեց ու սիրեց գործել, տառապել և մեռնել Հայրենիքի համար»:
Գլուխ խոնարհենք Ազատամարտի տարիներին նահատակված քաջորդիների հիշատակի առաջ:
Արցախի ազատամարտիկների միության վարչության անունից երախտագիտություն ու շնորհակալություն եմ հայտնում Արցախյան գոյապայքարի նվիրյալ Արմեն Ծատրյանի հարազատներին, Մաճկալաշեն համայնքի դպրոցի ուսուցիչներին՝ այդպիսի հայրենասեր զավակ դաստիարակելու համար:
Փա՜ռք մեր Հայրենքիի անձնվեր ու քաջ ազատամարտիկներին, փա՜ռք Երկրի ազատության և անկախության համար իրենց կյանքը նվիրաբերած մարտիրոսներին:
Արցախի ազատամարտիկների միության նախագահ գեներալ-մայոր Սամվել Կարապետյան