Գոռ Երմալովյան

Գոռ Վարդանի Երմալովյանը (Կեսարացի Գոռը)   ծնվել է 2001թ. հունիսի 29-ին Արմավիրի մարզի Նոր Կեսարիա գյուղում։ Դեռ մանկուց զբաղվել է տարբեր սպորտաձևերով և արժանացել տարբեր շքանշանների։

Աստվածապաշտ էր Գոռը՝ հավատքով լի։ Բնավորությամբ բարի, կամեցող, բարեպաշտ, ծնողասեր, նաև շատ համառ իր նպատակների մեջ։

Գոռը ծառայության էր մեկնել 2019թ.-ին Կուբաթլուի զորամաս։ Ծառայությունից երբևէ չի դժգոհել ծնողների կամ հարազատների հետ խոսելիս, միշտ բարձր տրամադրություն է ունեցել։

«Իմ մոտ ամեն ինչ թույնա, հանգիստ եղեք», — հեռախոսազրույցի ժամանակ միշտ ասում էր Գոռը։

Չարաբաստիկ պատերազմի ժամանակ Գոռը հասցրել է խոցել 2 մարտական մեքենա և 5 տանկ։ Նա մարտերի ժամանակ հրամանատարական բարձր առաջադիմություն է ցուցաբերել և շրջափակումից դուրս բերել զորքին՝ փրկելով 25 զինվորի կյանք։

Գոռը հրամանատարության կողմից պարգևատրվել է «Անբասիր Քաջարի մարտիկ», «Բանակի գերազանցիկ» և մի քանի այլ շքանշաններով, որոնք ստացել է և որոնց մասին ծնողները իմացել են նրա մահից հետո միայն։

Պատերազմի ժամանակ միշտ ասում էր, եթե իմ հրամանատարը՝ ունենալով երեխա և կին գնացելա առանց իր կյանքը խնայելու, ես չգնալու իրավունք չունեմ։

Գնաց և միացավ իր ընկերներին ու հրամանատարին։