Մանվել Խարդալյան

Ծնվել է 1986 թվականի ապրիլի 12-ին, մայրաքաղաք Երեւանում: Սովորել եւ ավարտել է Երեւանի թիվ 179 հիմնական դպրոցը, դպրոցի սիրված աշակերտներից մեկն էր: Ընտանիքում եւ դպրոցում ստացել է հայեցի դաստիարակություն, մեծ սեր ուներ Հայրենիքի նկատմամբ:

 2004 թվականին ծառայության է անցել ՀՀ Զինված ուժերում, եղել է դիպուկահար: 

2009-2019 թվականներին աշխատել է Ռուսաստանի Դաշնության Մոսկվա քաղաքում։ Մանվելը ամուսնացած էր, ունի երեք երեխա, որոնցից երկուսը սովորում են Երեւանի թիվ 197 հիմնական դպրոցում: Մանվելը շատ լավ ամուսին էր, հոգատար հայր, լավ որդի, եղբայր, ընկեր, պարզապես՝ մեծատառով մարդ:

 2020 թվականի սեպտեմբերի 27-ին, երբ սկսվեց չարաբաստիկ պատերազմը, Մանվելը լուրը լսելուն պես կամավորագրվեց, որպեսզի մեկնի հայրենիքի սահմանները պաշտպանելու: Մի քանի անգամ մերժել էին, սակայն Մանվելի հաստատակամությունը հաղթեց՝  հոկտեմբերի 4-ին  նա մեկնեց  Արցախ։ Որպես գնդացրորդ կռվում  էր առաջնագծում։ 

Կռվել է Ջրականում, Հադրութում, Վարանդայում: Ջոկատի տղաներից շատերը մարտերի ժամանակ  զոհվում են, իսկ Մանվելը շարունակում էր  կռվել։ 

 Հոկտեմբերի 14-ին   «Լեգիոն»  ջոկատի հետ շարժվում են Վարանդայի ուղղությամբ: Հոկտեմբերի 16-ին  ծանր մարտերի ընթացքում Մանվելը ստանում է բեկորային վնասվածք, որը ցավոք մահացու է լինում: 

Մանվել Խարդալյանը զոհվել է Քյարքաբազար կոչվող հատվածում: Ինքնությունը հաստատվել է 2021 թվականի հունիսի 23-ին: Հետմահու պարգեւատրվել է   «Մարտական ծառայության» մեդալով։

Հուղարկավորված է ընտանեկան գերեզմանատանը։