Կարենը պատրաստվում էր զինվորական դառնալ
Հունվարի 28-ին Մատաղիսի դիրքերում դիպուկահարի գնդակից զոհված սիսիանցի զինծառայող Կարեն Գալստյանի դին նախօրեին ժամը 18-ի սահմաններում հանձնեցին հարազատներին: Այս մասին գրում է vorotan.am-ը:
19-ամյա պատանու զորացրմանը մնացել էր ընդամենը 4 ամիս:
Հարազատների խոսքով՝ Կարեն Գալստյանը մտադրություն ուներ պարտադիր զինծառայությունն ավարտելուց հետո անցնել հիմնական զինվորական ծառայության, որովհետև զինվորական համազգեստը շատ է սիրել:
«Կարենը շատ ծանր էր տարել մարտական դիրքերում հերոսաբար զոհված Արմեն Հովհաննիսյանի մահը, բայց և հպարտացել է նրանով,- vorotan.am-ին պատմել է Կարենի քույրը՝ Արմինեն,- իսկ երբ նույն այդ ժամանակ նրան 12-օրյա արձակուրդ են տվել տուն գալու և հարազատներին տեսակցելու, հրաժարվել է՝ ասելով՝ Արմենը այնտեղ զոհվի, ես գնամ տուն-հանգստանամ, երևի նրան վիճակված չէր գալ, նրան պիտի բերեին… »,- ասել է Կարենի քույրը:
Համագյուղացիները և հարազատներն ասացին, որ Կարենը բացառիկ տղա էր, բարի, կամեցող, հասնող:
«Գիտենք, որ Կարենին մեդալ են տվել հետմահու, չգիտենք էլ, թե ինչ մեդալ է, էական էլ չէ, բայց փորձում ենք մեզ մխիթարել նրանով, որ Կարենի համար ողջ Ույծն է սգում, ողջ Սիսիանը եւ հայ ժողովուրդը»,- ասել է Կարենի ողբայրը:
Ծնողների համաձայնությամբ Կարեն Գալստյանը կհուղարկավորվի Սիսիանի քաղաքային պանթեոնում:
Նշենք, որ նախօրեին ի հիշատակ Կարեն Գալստյանի Սիսիան քաղաքի կենտրոնական հրապարակում տեղի ունեցավ մոմավառություն:
Հիշեցնենք, որ հունվարի 28-ին հյուսիսային ուղղությամբ տեղակայված զորամասերից մեկի պահպանության տեղամասի մարտական դիրքում հակառակորդի դիպուկահարի կողմից արձակված գնդակից գլխի հատվածում մահացու հրազենային վիրավորում է ստացել զինծառայող, 1994թ. ծնված Կարեն Գագիկի Գալստյանը:
Կարեն Գալստյանը հետմահու պարգևատրվել է ԼՂՀ «Մարտական ծառայության» մեդալով: