Մեսրոպին գտել են իր զինվորի կողքին
Մայոր Մեսրոպ Վարդանյանը ծնվել է 1990 թվականի մարտի 13-ին, Լոռու մարզի Լեռնանցք գյուղում։ Բանակի շարքերում էր 2012 թվականից։ Վազգեն Սարգսյանի անվան ռազմական համալսարանն ավարտելուց հետո ծառայության էր անցել Արցախում։
Մեսրոպ Վարդանյանը սկզբում տանկիստ է եղել, խելացի ու համեստ մարդ էր, ամեն տարի թե պաշտոնով, թե կոչումով բարձրանում էր, 6 տարում մայոր դարձավ։ Շուտով պետք է փոխգնդապետի կոչում ստանար: Նաեւ բարոյահոգեբանական գծով հրամանատարի տեղակալն էր:
Մեսրոպը առաջին իսկ օրվանից մասնակցում էր պատերազմին, կռվել է ամենաթեժ կետերւմ։ Սկզբում Քանտ-Հորադիզ-Ջրական ուղղություններում, ապա՝ հոկտեմբերի 26-29-ին, մասնակցել է Ավետարանոց գյուղի ինքնապաշտպանական մարտերին, տանկի եւ ՀՄՄ-ի անձնակազմներին դուրս բերել շրջափակումից։
Նոյեմբերի 6-7-ին, որպես տանկի անձնակազմի հրամանատար, կամավոր մեկնել է Շուշի՝ շրջափակման մեջ գտնվող զինվորներին դուրս բերելու։
Նոյեմբերի 8-ին 2 անգամ կարողացել է մտնել ձորը, շրջափակման մեջ գտնվող զինվորներին թիրախավորած թուրքերի ուշադրությունն իր վրա գրավելով ու փրկելով զինվորների կյանքը։
Երրորդ անգամ հայտնվել է շրջափակման մեջ, տանկը խոցվել է, ինքն ու անձնակազմի մի զինվոր ծանր վիրավորվել են։ Կապվել է բժշկի հետ, նկարագրել զինվորի վիճակը,նաեւ ասել որ ինքը շատ թույլ է, չի կարող դուրս գալ։ Երեկոյան արդեն զանգերն անպատասխան էին։
Որոնման աշխատանքների ժամանակ Մեսրոպին գտել են իր զինվորի կողքին։