Նա մշտապես իր ենթակա անձնակազմի հետ էր
Ծառայողական բնութագիր
Վաչագան Վալերայի Դադալյանը, լինելով հայրենիքի արժանի զավակ, դեռ տասնութ տարին չլրացած, իր կամքով, ծնողի համաձայնությամբ 2016թ․ հուլիս ամսից զորակոչվում է զինվորական ծառայության։
Հաշվի առնելով իր հմտություններն ու կարողությունները՝ նշանակվում է ՊԲ 35383 զորամասի Զենիթային հրթիռային հրետանային մարտկոցի Զենիթահրթիռային դասակի դյուրակիր զենիթահրթիռային համալիր « իգլա » համալիր ջոկի հրաձիգ զենիթահարի պաշտոնում։ Ծառայության ընթացքում ձեռք բերած մասնագիտական և կազմակերպչական ցուցանիշների շնորհիվ նշանակվում է ԴԶՀՀ ջոկի հրամանատարի պաշտոնում և շնորհվում «ավագ սերժանտ» զինվորական կոչում։ Որպես կրտսեր հրամանատար՝ նա կարողանում էր հմտորեն ղեկավարել ջոկը։ Ծառայության ընթացքում ցուցաբերում էր մասնագիտական բարձր ցուցանիշներ։ Համաբանակային մրցումներում բազմիցս զբաղեցրել է մրցանակային տեղեր, այդ թվում՝ ՀՀ ԶՈՒ ՀՕՊ զորքերում և արժանացել տարբեր խրախուսանքների։ Լիարժեք տիրապետում էր իրեն վստահված սպառազինությանը, ռազմական տեխնիկային և հստակորեն կատարում դրանց շահագործման պահանջները։
Մարտական պատրաստության հիմնական առարկաները Վաչագանը լավ է յուրացրել։ Հրամանատարության և համածառայակիցների կողմից բնութագրվում էր դրականորեն։ Ունակ էր պահպանելու պետական և ռազմական գաղտնիքները։
2021 թվականին, զորամասի հաստիքային փոփոխություններից ելնելով (ժամկետային կազմը փոխարինվում է պայմանագրային կազմով), ստորաբաժանման թափուր հաստիքները համալրելու նպատակով, խիստ անհրաժեշտությունից ելնելով, Վաչագան Դադալյանին առաջարկվել է զինվորական ծառայության անցնել զորամասի Զենիթահրթիռային մարտկոցում՝ պայմանագրային հիմունքներով, սակայն նշված ժամանակահատվածում պարզ է դարձել, որ նա ծառայում է Ստեփանակերտի ոստիկանության ՊՊԾ-ի գումարտակում։ Հատկանշական է նրա մասնակցությունը 2020 թվականի 44-օրյա պատերազմում ԱՀ ինքնապաշտպանության մարտական գործողություններին ՝ ըստ ՊՊԾ-ի պետ, ոստիկանության գնդապետ Ա․ Յու․ Բաղրյանի կողմից տրված № 7-1⁄89 առ 26․01.2021 թվականի տեղեկանքի։
Ըստ անհրաժեշտության՝ 2021 թվականին Վաչագան Դադալյանը տեղափոխվում և նշանակվում է զորամասի Զենիթահրթիռային մարտկոցի 2-րդ ԶՀ դասակի 2-րդ ԴԶՀՀ ջոկի հրամանատարի պաշտոնում։
Ավագ սերժանտ պայմանագրային Վաչագան Դադալյանը՝ որպես բանիմաց և կարգապահ հրամանատար, հետագա ծառայության ընթացքում արժանացել է բազում պատվոգրերի և շնորհակալագրերի։ Պատվով է կատարել իր առջև դրված մարտական խնդիրները։ Մարտական հերթապահության կրման ժամանակ՝ որպես օրինակելի հրամանատար, ժամանակին կարողանում էր ճիշտ կողմնորոշվել տեղանքում և անցնել պաշտպանության։
Հաշվի առնելով Վաչագան Դադալյանի կարողությունները և բարձր պատասխանատվությունը՝ ՀՀ ՊՆ 1402-Ա առ 07․04․23 թվականի հրամանով նշանակվում է զորամասի Զենիթահրթիռային մարտկոցի 2-րդ Զենիթահրթիռային դասակի հրամանատար։ Լինելով բանիմաց, պատասխանատու և կարգապահ սպա՝ դասակի հրամանատար, ավագ սերժանտ պայմանագրային Վաչագան Դադալյանը օրինակ էր ծառայում իր ենթակա դասակի անձնակազմի համար։ Հրամանատարական պաշտոնը զբաղեցնելուց հետո, թեպետ չէր ստանձնել սպայական կոչում, այնուամենայնիվ, իր ստորաբաժանումը մշտապես աչքի էր ընկնում իր կարգապահությամբ և մարտական պատրաստվածությամբ։ Նա հմուտ սպա էր, հավասարակշռված, երբեմն անում էր այն, ինչն անհնարին էր թվում։ Թեև խիստ ու պահանջկոտ սպա էր, բայց նրան հաջողվում էր իր ենթակաների հետ ընկերական հարաբերություն հաստատել ու վայելել նրանց սերը, հարգանքն ու վստահությունը։ Սակայն 2023 թվականի սեպտեմբերի 19-ին Վաչագան Դադալյանը «լեյտենանտ » սպայական կոչման սպասումներով մեկնեց առաջնագիծ։ Նա մշտապես իր ենթակա անձնակազմի հետ էր։ Հաշվի առնելով պետական պաշտպանության վտանգի աստիճանը՝ նա ընտրեց ամենավտանգավոր ուղղությունը՝ «Լուսնյակ» կոչվող բարձունքը, որտեղից սպասվում էին հավանական հակառակորդի օդուժի գործողությունները։ Կարճ ժամանակահատվածում ենթակա անձնակազմի հետ անցնում է պաշտպանության։ Զեկուցելով վերադաս ՀՕՊ կառավարման կետ ենթակա ՀՕՊ ուժերի և միջոցների թիվ 1 պատրաստականության բերման միջոցառումները՝ նա պատրաստ էր մարտի։
2023 թվականի սեպտեմբերի 19-ին Ադրբեջանը մեծ ուժերով գրոհեց Արցախի սահմանների հայկական մարտական դիրքերը։ Հակառակորդը « Լուսնյակ » կոչվող բարձունքի շրջանում զավթեց մի քանի դիրքեր և փորձում էր ներխուժել նշված տարածքի խորքը։
Թշնամուն ընդառաջ դուրս եկավ բարձունքում տեղակայված ՀՕՊ ստորաբաժանման անձնակազմը՝ հրամանատար Վաչագան Դադալյանի ղեկավարությամբ։ Հմուտ հրամանատարը մարտնչել է նշված դիրքում և ցուցաբերել գրագետ մարտավարություն։
Սակայն թշնամու օդային հարվածից հրթիռակոծվում է դիրքը, որտեղ անմահանում է հերոս Վաչագան Դադալյանը՝ փրկելով զինակից ընկերների կյանքը։
Հայրենիքի անձնուրաց պաշտպանության համար ԱՀ նախագահի 2024 թվականի № 52-Ա հրամանագրով Վաչագան Դադալյանը հետմահու պարգևատրվել է «Արիության» մեդալով։
3-րդ պահպանության բրիգադի Հակաօդային պաշտպանության բաժանմունքի պետ մայոր Վ․ Համբարձումյան