Նահատակ պայմանագրայինը Անգեղակոթից էր
Կիրակոսյան Արայիկ Էդիկի. ծնվել է 1991 թ. մայիսի 16-ին Սիսիանի շրջանի Անգեղակոթ գյուղում: Սովորել է Անգեղակոթի միջնակարգ դպրոցում: 2009-2011 թվականներին ծառայել է Հայոց բանակում:
Ամուսնացած էր՝ ունի երկու որդի:
Բանակից զորացրվելուց շատ չանցած՝ պայմանագրային ծառայության է անցել Սիսիանի զորամասում:
Արայիկը վարորդ էր. Սիսիանի մերձակա դիրքեր տանող ճանապարհները ծանր ու դժվարանցանելի են, բայց Արայիկը երբեք դիրքապահ տղաներին կես ճանապարհին չի թողել, դիրքապահ ընկերներից Տիգրանն է պատմում Արայիկի մասին. «Մեզ հետ բարձրանում էր դիրքեր, մնում էր մեզ հետ, փորձում էր օգնել յուրաքանչյուրին: Օգնող, հասնող մարդ էր, համեստ, բարի, ընկերասեր, գյուղում հարգված, բոլորիս կողմից սիրված: Միակ տղան էր, քույրեր ուներ, բայց եղբայր չուներ: Արայիկը երկու տղա ունի, հիմա ինչքան գիտեմ, գյուղում չեն, ծնողների հետ էին, բայց հիմա ծնողները երեխաների կարոտով են ապրում: Արայիկի նման տղաները պիտի շատ լինեն, որովհետեւ մարդ պիտի կարողանա պետքական լինել, Արայիկը բոլորի համար եւ բոլոր տեղերում կարողանում էր իրեն դրսեւորել՝ հմուտ վարորդ էր, լավ զինվորական, բանիմաց հողագործ, հասնող-օգնող համագյուղացի ու ընկեր: Մի խոսքով՝ հրաշալի մարդ էր: Հոկտեմբերի 7-ին գնաց Արցախ, մի քանի օր անց իմացանք, որ զոհվել է, անասելի ցավ է տեսնել , թե ինչպես է պատերազմը խլում երիտասարդ տղայի կյանք՝ ծնողներին հավերժ սգավոր, երեխաներին՝ որբ թողնում. անիծվի պատերազմը...»:
Արայիկ Կիրակոսյանը զոհվել է հոկտեմբերի 10-ին Կարմիր Շուկայի մոտակայքում: Հուղարկավորվել է հոկտեմբերի 29-ին Անգեղակոթի պանթեոնում: