«Տղերքը թասիբով պիտի լինեն, աղջիկները՝ բախտավոր»
Արցախի ՊԲ հրամանատարի տեղակալ Արթուր Սարգսյանը 45 տարեկան էր, Արմավիրի մարզի Էջմիածին քաղաքից: Ընտանիքն ապրում է Էջմիածնում: Այս մասին ArmDaily.am-ի հետ զրույցում պատմեց Սարգսյանի եղբոր դուստրը՝ Աննա Գրիգորյանը:
«Հորեղբայրս մեծ հարգանք էր վայելում իր շրջապատի և իր զինվորների կողմից։ Իր բոլոր զինվորներին վերաբերվում էր իր հարազատ որդու նման։ Հայտնի էր որպես Սիսական գնդի Լեգենդար հրամանատար։ Հորեղբայրս ունի իր նման երկու առյուծ տղաներ՝ Արամն ու Սարգիսը ու վստահ եմ նրանք բարձր կպահեն իրենց Հերոս հայրիկի պատիվն ու անունը... Մեր բոլոր ուրախ առիթների քեֆ անողն էր հոպարս, բոլորիս սիրում էր, բոլորիս։ Շատ ասում էր «Տղերքը թասիբով պիտի լինեն, աղջիկները բախտավոր»: Իր գործում նվիրյալ էր, պատերազմի առաջին օրերին վիրավորվել էր, լուրջ վնասվածքներ ուներ, բժիշկն արգելել էր սահման գնալ, բայց այդ վիճակով, մինչև վերջին շունչը իր զինվորին թև ու թիկունք է եղել, դուխ տվել, ու ընկել Հերոսի մահով»,- պատմում է Աննան:
Սարգսյանն ընտանիքին վերջին անգամ դեպքի օրն է զանգահարել՝ հոկտեմբերի 25-ին: «Մենք գիտեինք, որ վիրավոր է, առաջնագիծ չի գնա, մի փոքր հանգիստ էինք: Որդիներից Արամը 18 տարեկան է, ծառայում է, իսկ Սարգիսը 15 տարեկան է»:
Խոսելով նպատակների ու կիսատ թողած գործերի մասին Աննան նշեց. «Հոպարը շատ նպատակներ ու կիսատ գործեր ուներ։ Արամը բժշկական համալսարան է ընդունվել, երազում էր տղային տեսնել սպիտակ խալաթով։ Սարգիսն էլ այնքան նման է հայրիկին, բնավորությամբ, շարժ ու ձևով: Երկրորդ մասնագիտությունը գինեգործ էր, սիրում էր նաև այս մասնագիտությունը: Ակադեմիան 2003-2005 թվականներին է սովորել Մոսկվայում, վերադարձել հայրենիք։ Միշտ ասում էր լավ մարդ դարձեք ձեր կյանքում ու որ օտար հողում եք ձեր ազգակցին ամուր պահեք ձեր կողքին»:
Նշենք, որ գնդապետ Արթուր Սարգսի Սարգսյանը հուլիսի 4-ին էր նշանակվել է Արցախի Հանրապետության պաշտպանության բանակի հրամանատարի բարոյահոգեբանական ապահովման գծով տեղակալ: