Էդուարդ Ղազարյան

Էդուարդ Ալեքսանդրի Ղազարյանը ծնվել է 2000 թ-ին հուլիսի 30-ին, Երևանում։ 2006-2011թթ. սովորել է Երևանի Համբարձում Գալստյանի անվան թիվ 83 դպրոցում, 2011-2015 թթ.՝ Նաիրի Զարյանի անվան թիվ 130 դպրոցում։ Այնուհետև ուսումը շարունակել է Պոլիտեխնիկական Համալսարանի ավագ դպրոցում։

 2018 թ֊ին ընդունվել է Պոլիտեխնիկական Համալսարանի Էլեկտրոնիկայի ֆակուլտետ։ 2019 թ-ի հունվարի 23-ին բուհական ուսումը կիսատ թողնելով՝ զորակոչվել է բանակ և ծառայել Արցախի Հանրապետության Մարտունի 3 7-րդ վաշտում, որպես գնդացրորդ։ 

Առաջին օրվանից մասնակցել է 44-օրյա պատերազմում` անձնվիրաբար պաշտպանելով իրեն վստահվված դիրքը։ Զինակիցների հետ մասնակցել է դիվերսիաների, գրավել թշնամու 4 դիրք։

Հոկտեմբերի 11-ին Էդուարդը 7 վաշտի 73- հոգանոց կազմով մեկնել է Հադրութ՝ հատուկ գործողություն կատարելու։ Հանդիպելով թշնամու դիվերսիոն հետախուզական մի քանի անգամ գերազանցող ուժերին (յաշմա ջոկատների) Էդուարդը հայտնվել է թշնամու կողմից շրջափակման մեջ, սակայն գերի չի ընկել, չի նահանջել, մարտնչել է մինչև վերջին շունչ, թշնամուն պատճառելով զգալի կորուստներ։ 2020 թ֊ի հոկտեմբերի 11-ին Էդուարդը՝ ի պաշտպանություն Արցախ աշխարհի և Հայրենիքի փրկության, զոհաբերեց սեփական կյանքը։

Էդուարդ Ալեքսանդրի Ղազարյանը պատերազմի ընթացքում ցուցաբերած բացառիկ քաջության ու արիության համար պարգևատրվել է «Մարտական խաչ» 1֊ին աստիճանի շքանշանով և «Արիության համար» մեդալով։

Բանակում Երդման արարողության ժամանակ Էդուարդը երդվել է այսպես՝

«Ծառայում եմ ՀայաստանիՍ Հանրապետությանը»։

Սա երևի ամենաշատն է բնորոշում Էդուարդին, որովհետև Էդուարդը հենց սրտով էր զգում, որ Հայաստանն իրենն է...