Վահեն ճանապարհ է ցույց տալիս ինձ
Կարինե Մուրադյանի որդին՝ Վահեն ևս 19 տարեկան էր։ Միասին էսթետիկ կենտրոն էին հիմնել, որը որդու մահից հետո վերագործարկելու համար մեծ ուժ, համբերություն ու կամք էր պետք. «Որովհետև սա արվում էր հենց իր համար, ինքը իմ տղա տեսակն էր։ Վաղը, մյուս օրը ես գիտեմ, որ ինքը կունենար հաջողություն, բայց չէի պատկերացնում, որ այս տիպի։ Մենք սկսել էինք բիզնես ծրագիր, այս պրոդուկտը դրա արդյունքն է։ Օգոստոս-սեպտեմբեր ամիսներին մենք երկուսով՝ ինքը՝ Ջաբրայիլում, ես՝ այստեղ, երևի թե ամեն օր խոսում էինք միայն դրա մասին»։
Վահե Եղիկյանի հետ կապը սեպտեմբերի 30-ին էր ընդհատվել։ 25 տանջալից օր ու գիշեր պահանջվեց որդուն գտնելու համար։
Չարագուշակ տեսի՞լք էր, թե՞ ինչ. Կարինեն հիմա չի հասկանում, բայց տեսել էր, սիրտը վկայել էր՝ տղային ողջ չի գտնելու. «Ես ինքս էի բոլորին ասում՝ գնացեք, դիակը գտեք, բերեք, հողի տակից էլ փորեք, բերեք, ինձ չի հետաքրքրում»։
Վահեն ինքն է հուշել ճանապարհը՝ ինչպես գտնել իրեն, ասում է մայրը՝ հիշելով մղձավանջային այն ուղին, որով անցել է՝ ոտքի տակ տալով Հայաստանն ու Արցախը՝ հիվանդանոցներ, դիահերձարաններ. «Երբ ես գրկեցի փակ դագաղը ու տեսա այդ սգո սրահը, որ հենց նույն տեսիլքի սգո սրահն էր, ես հասկացա, որ իմ տղան ինձ նախապատրաստեց, ու այդ գերբնական ուժն իմ մեջ ես վերցրել եմ, ինքը մտավ կոնկրետ, ես դա զգացել եմ ու իրեն խնդրեցի, որ ինքը ինձ ցույց տա մի լույս, ճանապարհ, որ ես դուրս գամ այդ մղձավանջից։ Հետաքրքիր ինչ-որ ֆենոմեն կատարվեց։ Ես մինչև այսօր անվանում չունեմ դրան, դա ուղղակի իմ զգայարանների հարթության վրա եմ դրել ու զգացել եմ, ընդամենը ուզում էի մոտենալ ինձ նման ինչ-որ մի մամայի, խոսեի, շփվեի»։
«Հավերժ» հասարակական կազմակերպությունը հենց այն առաքելությունն էր, որ պետք է միավորեր 44-օրյա պատերազմում զոհված զինծառայողների մայրերին։ 300-ից ավելի կին այսօր իրար օգնելով է ապրում։ Կարինեի ստեղծած «Հավերժ»-ի օգնությամբ 13 կին արդեն նոր մասնագիտություն ունի՝ հոգեբանական աջակցության խորհրդատու են. «Այն, որ ես հասկանում եմ, որ կա, գործում է, ու ապացուցում եմ ինձ կրկին, որ դա արդյունք է տալիս ու դրական, ես ուրախանում եմ։ Ինձ համար դա դարձավ կյանքի նպատակ»։
Վահեն ինձ պետք է գեղեցիկ, խնամված, ուժեղ տեսնի, ինչպես միշտ, ասում է բիզնեսում հաջողության հասած Կարինեն՝ ավելացնելով՝ իր որդին հիմա էլ իր հետ է, միասին են աշխատում, Վահեն ճանապարհ է ցույց տալիս իրեն...