Զոհվելուց առաջ սարսափելի երազ էր տեսել
Մովսես Սարգսյանը երազում էր դերասան ու պարող դառնալ
19-ամյա Մովսես Սարգսյանի մայրը՝ Աիդան, հիմա որդու մասին գրքի որոշ հատվածներին է ծանոթանում։ Այն շուտով կհրատարակվի, ընկերներից մեկն է գրել։
Մովսեսի մասին արդեն մի ֆիլմ է նկարահանվել, մորաքրոջ բանաստեղծության հիման վրա գրված երգն էլ տեսահոլովակ ունի։ Պրեմիերան տղայի ծննդյան օրը տեղի ունեցավ. բակում ընկերները հավաքվել, կիթառ էին նվագում, երգում։
Մոսին արվեստի մեջ էր, ասում է մայրը. մահից հետո էլ ոչինչ չի փոխվել. «Ինքը երազում էր դերասան դառնալ, պարող դառնալ, 6 տարեկանից պարի էր հաճախում։ Ասում էր՝ ես հենց որ վերադարձա, մի պար եմ անպայման բեմադրելու»։
Վերջին զրույցը որդու հետ նոյեմբերի 5-ին էր, ուշ երեկոյան տղան արդեն դեպի Շուշի ճանապարհին էր. «Զոհվելուց ընդամենը մի 5 օր առաջ զանգեց ու մի հատ այնպիսի երազ պատմեց, որ սարսափի մեջ էինք։ Ասաց՝ մամ, գիտես՝ երազումս, սնարյադը մտավ գլուխս, ու ես մահացա։ Ասում է՝ ես Աստծուն խնդրեցի, ասացի՝ գնա, ուզում եմ ապրել, սովորել, ու Աստված ոչինչ չասաց։ Մի 5-6 օր հետո դեպքը եղավ, ու ինքը գլխի հատվածից էլ զոհվել էր»։
Մովսեսն Աիդայի միակ երեխան էր։ Ինքը գնաց, ընկերներին թողեց ինձ, ասում է տղային միայնակ մեծացրած մայրը. «Մոսիիս ամենամեծ նվերն եք ինձ համար, ու ես իրենց շատ-շատ շնորհակալ եմ, որ իրենք անընդհատ իմ կողքին են, ու մենք համախմբված անում ենք ամեն ինչ իմ Մոսիիս համար»։